A Muntagnera

Eléments lexicaux et phonétiques

Ch'ellu si n'hè scorsu maghju
Sarà più d'una simana
Appròntati, o capraghju!
À lascià piaghja è calmana
Ch'hai da fà l'altu viaghju
Dopu ghjuntu in Barghjana

Avvèdeci, o Falasorna!
Cù i parenti è l'amichi
Sempre ligati à Niolu
Per e gioie è i castichi:
Da Montestremu à u mare
Avemu listessi antichi.

Sbuccarai in Caprunale
Guardendu da altu à bassu
Supranèndune à Òmita
È a funtana di u Tassu
Bàsgiati a croce nova
Chì a vechja ùn s'hè più trova.

U terzu ghjornu à la mane
Ti n'andarai vulinteri
In Sesta o Petra Pinzunta,
Bicarellu o à Tileri;
Più chè mai ghjunghjeranu
À l'abbordu i frusteri.

Avà chì hai righjuntu
Di l'estate u rughjone
Di tantu in tantu in paese
Affàccati à l'occasione
Poi ùn mancà a to festa
A mane di Sant'Antone.