Нелеш Ит Нал, Авай

НЕЛЕШ ИТ НАЛ, АВАЙ...


Кайыккомбо семым пӧлекла кава,
Шыже той йолважым тӱнялан шава.
Жап эрта ман ит ойгаҥе, аваем,
Кажне пагыт лийже чонетлан пайрем.
Илыш вийым пуэнат тый мыланна,
Шулдыраҥын, ме торашке каенна.
Ит ойгаҥе кажнын верчын, шыргыжал.
Кумылет кодеш, палем. Нелеш ит нал.


Йӱд омет мыняр кошкен, чонет йӱлен...
Моштенна мо йоча годым умылен?
Тыланет эҥертыш лийынна шагал,
Эх, авай, шочшет-влаклан нелеш ит нал.
Илыш тӧрсыран, лиешыс чылажат,
Ынде мый чон кумылет шкеат шижам.
Вачышкет вуем пыштем, йодам, ӧндал.
Ӱдыретлан, аваем, нелеш ит нал.