الدقه المخمليه

عباث سوا وراء عوج النحايف ممر
‏ خلاني أقرا غلط وأنا من التايبين
أستغفر الله تعالی ما قدرت أستمر
ولا تحملت من كبر الخطا فايتين
يمكن تقولون يقرا الكافرون الغمر
لكن أنا قلت قل يا أيها الكافرين
يا رب وإنت أعلم إن الحال الأحول شمر
إلطف بعقل المفارق وإرحم العاشقين
العاشق أثره يمر بمرحلة في العمر
لا هو من المعرضين ولا من المتقين
الحال ما من هنا والخاطر أدهى وآمر
‏والحيلة الله قوي والضيقة الله يعين
‏تشب نار مثل نار الهنود الحمر
‏ودور وتصيح وتسد الثغر باليدين
لا يحسبن الهوى فنجال صين وثمر
الثمر جمرة غضى والسم فنجال صين

أعرضت عن كل غيدا غشمرية عمر
إلا هوى العفري الغض العفيف الثمين
غزيل الريف حقه من قطوف الثمر
جارية الأنهار وآلم مشى الأميري يمين
‏رجلينه تقول فيها مثل ياي الهمر
‏ يا طا على ياي ما ياطا على كاحلين
حتى الحزام الدمشقي لو يمسه ضمر
وشلون مدري ما عرف حزامه يروح وين
‏أنا ليّ شفت وجهه كاني أشرب خمر
‏هذا ماهو بآدمي هذا خمر مسلمين
بمكعبات الثلوج اللي ما بين الجمر
وحجارة التلمسان اللي على الحاجبين
والدقة المخملية والخمار الحمر
والوردة الطايفية والشهد واللجين
بالله أبنشدك يوم إن القصيد إنهمر
والسطر مافي آخره نقطة ولا نقطتين
غريبة العالم اللي يعشقون السمر
‏إن كان شافوك زين وشافوا البدر زين
‏ما حطوا مقارنة بينك وبين القمر
‏أوجد ثلاثة فوارق بين ها الكوكبين
‏أوجد ثلاثة فوارق بين ها الكوكبين