دمع العظيم

يا الغيمة اللي دوى رعدك وبرقك سرى
ترى دموع الكرام أشبه بمزن الغمام
الغيم مزنه نـتاجه عشب فوق الثرى
ودموع الأكرام تصنع حزن عند الكرام
المـرء ماضيه يبقى معه مهما جـرى
تاريـخ الإنسان وسط الذاكرة له مقام
عـينٍ لها دهـر ما ذاقت لذيـذ الكرى
تحقّق المستحيل وتبدع في كل عام
ما طاح من دمعها فوق الخدود وجرى
الواجـب الخــد يستـقبلـه بالإبتسـام
هذي دموع الكريم الطيّب اللي ظرى
على مصادم كبار المعضلات الجسام
يوم انبرت له صواديف الزمان انبرى

لحـلّـها رافـعٍ رايـاتـه إلى الأمـــام
لا يفرح الشامت اللي عنه ما أحدٍ درى
ما طاحت من القهر والعشق ولاّ الهيام
طاحت على اللي حضنها كان ظل وذرى
كانت بداية طموحاته ما كانت ختام
الصـبح يـبدا بطـاريها لا منّـه طـرى
وإن نامت الكون كله في عيـونه ينام
وصّـى عليها رسـول الله بين الـورى
ثلاث مرّات لين أسمع جميع الأنام
فرحـمة الله لها من رب أم القــرى
ولخـاتم الأنبـياء منّـي عليها الســلام
دمع العظيم في رحاب الأم يا من ترى
شعور لو جيت أبا أوصّفه، شاب الكلام