Bê To (Without You)

نەمردم من ئەگەر ئەمجارە بێ تۆ
نەچم، شەرت بێ، ھەتا ئەو خوارە بێ تۆ
دەروونم خاڵییە، وەک نەی دەناڵێ
ھەوارێکی چ پڕ ھاوارە بێ تۆ
بیناییم کوێرە، ھەڵنایێ بە ڕووی کەس
موژەم یەک یەک دەڵێی بزمارە بێ تۆ

قەسەم بەو شەربەتی دیداری پاکت
شەڕابم عەینی ژەھری مارە بێ تۆ
لەکن تۆ خار و خاس گوڵزارە بێ من
لەکن من خەرمەنی گوڵ خارە بێ تۆ
لەکن من با وجوودی ناس و ئەجناس
کەسی تێدا نییە ئەم شارە بێ تۆ

ھەتا تۆم ئاشنا بووی، ئاشنام بوون
ئەمێستا موو بە مووم ئەغیارە بێ تۆ
ھەموو ڕۆژێ لەتاو ھیجرانی ئەمساڵ
تەمەننای مردنی پێرارە بێ تۆ
لە حەسرەت سەروی قەددت چاوی نالی
دوو جۆگە، بەڵکوو دوو ڕووبارە بێ تۆ