Wasany Aboya

وصاني أبويا وقال لي شوف أنا خلفتي خلفة رجال
والراجل الجد بصحيح يعرف ينام مرتاح له بال
يعني الخلاصة من الكلام ع الناس يا ولدي ما تفتريش
وإياك تغرك دنيتك وهم سلطان ما يساويش
عيش الحياة من غير جحود مش ناس تموت علشان تعيش
ومهما كان الريح شديد ولد الغلابة ما ينحنيش
وما طاطيش للدنيا يوم وإياك تميل لو حالها مال
إياك تميل لو حالها مال، خليك عتيق زي الجبال

وصاني أعيش بين البشر راسي رافعها لفوق
ومخافش غير من ربنا ولا أنحني لمخلوق
وصاني أكون زي الميزان وأعدل ما بين الناس
وأرجع للضعيف حقه من أكلين الحقوق

وقال لي الحق مهما يغيب بيرجع ثاني لأصحابه
يا ويله اللي بيستقوى ييجي له الهم على بابه
وقال لي الكذابين خايبين مسيرهم يكشف حالهم
بيمهل بس ما بيهملش يا ويل الظلم وحسابه

هتعمل خير تلاقي الخير لينا يا ولدي رب كبير
يقبل دعوة المظلوم والظالم حسابه عسير
مادام رب العباد موجود مسير الحق بكرة يعود
ولا هتعمل لشيء حسابات مادام من ربنا مسنود

وقال لي الكبير هو اللي عاش شايل هموم الناس
قال لي الكبير عزوة وسند مش منظرة وخلاص
من صغره ولحد الكبر من طلته تهابه
ولا عمره جيه يوم ع الضعيف ولا داس في يوم ع الناس

آه هتعمل خير تلاقي الخير لينا يا ولدي رب كبير
يقبل دعوة المظلوم والظالم حسابه عسير
مادام رب العباد موجود مسير الحق بكرة يعود
ولا هتعمل لشيء حسابات مادام من ربنا مسنود

خليك عتيق زي الجبال