Afreen Afreen

Aankhein dekhiin to main dekhta rah gaya
Jaam do, aur donon hi do-aatisha
Aankhein ya mai-kade ke ye do baab hain?
Aankhein inko kahoon ya kahoon khawaab hain?

Aankhein neechi huuiin to haya ban gaiin
Aankhein oonchi huuiin to dua ban gaiin
Aankhein uth kar jhukiin to ada ban gaiin
Aankhein jhuk kar uthiin to qaza ban gaiin

Aankhein jin mein hain qaid aasman aur zameen
Nargisi, nargisi, surmai, surmai

Husn-e-janaan ki taareef mumkin nahiin
Husn-e-janaan ki taareef mumkin nahiin
Aafreen, aafreen, aafreen, aafreen
Tu bhi dekhe agar to kahe, hum-nashiin
Aafreen, aafreen, aafreen, aafreen

Husn-e-janaan ki taareef mumkin nahiin
Husn-e-janaan ki taareef mumkin nahiin

Aisa dekha nahiin khoobsoorat koi
Jism jaise, Ajanta ki moorat koi
Jism jaise, nigaahon pe jaadu koi
Jism naghma koi, jism khushbu koi

Jism jaise, machalti hui raagini
Jism jaise, mahakti hui chaandni
Jism jaise ki khilta hua ek chaman
Jism jaise ki sooraj ki pahli kiran

Jism tarsha hua dilkash-o-dilnashiin
Sandali, Sandali, marmari, marmari

Husn-e-janaan ki taareef mumkin nahiin
Husn-e-janaan ki taareef mumkin nahiin
Aafreen, aafreen, aafreen, aafreen
Tu bhi dekhe agar to kahe, hum-nashiin
Aafreen, aafreen, aafreen, aafreen

Husn-e-janaan ki taareef mumkin nahiin
Husn-e-janaan ki taareef mumkin nahiin