舞台 (Feat. 潘麗麗 & 黃昺翔)

粉按呢敢會傷白 衫按呢敢會傷狹
無熟的詞 敢愛閣重背
這馬敢閣有機會 換一雙皮鞋
問時間閣賰外濟 問聲音敢有OK
攑著麥克 我準備好勢
攑著麥克 你準備好袂

一曲鑼鼓起場頻頻送
毋知台跤幾個人
未曾上台兩袖已經澹
心茫茫跤步愈沈重

一步步行上台 閣緊張閣真期待
心跳甲遮爾厲害 無日無暝就是為著現在
掌聲小鼓勵一下 請問敢會使
愛外濟 其實我心內早就會知 這就是今生我的最愛
攑著麥克 感覺上自在
攑著麥克 毋驚有阻礙

這馬開始這是我的時代 我的天下 我的舞台
滿腹的爽快佮無奈 攏想欲唱予人知
毋捌咧驚失敗 我欲唱遍全世界
父母的忍耐 愛人的等待 朋友的剾洗 莫講我攏毋知

人笑我雙手空空 我感覺顛倒輕鬆
若看人假鬼假怪 假仙假 我就共噹
我知影總有一工 你會認得我的名 我的歌
徛佇舞台頂 對命運唱聲

一幕雙勾水袖蓋迷人
換去青春數十冬
縛戲人生苦旦嘆紅顏
時代也漸漸到坎站

為生活為將來 不管是委屈無奈
不管是海角天涯 飛東飛西來甲大家熟似
掌聲請鼓勵一下 來替我徛台
愛外濟 其實我心內早就會知 這就是今生我的最愛
若有麥克 就是舞台
就是舞台

一擺閣一擺 照鏡對自己講你一定會使
三教九流攏照過來 麥克攑著台頂我上歹
毋管對我敢有熟似 我就是遮爾精彩
你會大聲拍噗仔講這個少年仔其實真正袂䆀

半暝提著落南的車票流目屎
從來毋敢向望厝裡序大會當諒解
謝天謝地時機䆀䆀才無共我倖歹
徛踮這個舞台 我有我的光彩

一場煙花煞戲手攑懸
謝別青春舞台夢
越頭胭脂黯淡心相仝
是新人換舊人免送

想過去想未來 最感恩你的關懷
攏囥咧我的心內 一點一滴真正有夠厲害
掌聲閣鼓勵一下 催予通人知
愛外濟 其實我心內早就會知 這就是今生我的最愛
攑著麥克 我看到世界
攑著麥克 我自由自在

風咧吹攏無關係 歌欲點閣有真濟
有緣相會 我一定奉陪
趁這馬這咧機會 講出心內話
毋管伊青春閣賰外濟 只要有大家繼續鼓勵
攑著麥克 天下是我的

攑著麥克 天下是咱的
徛在舞台 毋願講再會