Lilo Chaman

हे रै रै रै रै
साचम साच बता दे रै लिलो
के ख़ुशी मनारी सै
साचम साच बता लिलो
के ख़ुशी मनारी सै

के भुझैगा चमन
आज मेरे ब्याह की त्यारी सै
हे रै रै रै रै
साचम साच बता दे रै लिलो

ब्याह आले दिन की
तारीख के लिखाई सै
तिथि तारीख तो लिखी
नहीं बस सलाह मिलाई सै
के छोरा देखण खातर जा लिए
बाहमण नाई सै
छोरा तो टोह राख्या सै
तकरार चलाई सै
कोण से शहेर नगर में लिलो
पति बणारी सै
एक चमन नाम का छोरा
जिसकी गैल्या यारी सै
हे रै रै रै रै
साचम साच बता दे रै लिलो

इतणी सेवा करी मन्नै
ला छाती के गैर ले
तेरे मेरे होंगे फेरे
रोक शहर ले
के फेरया में लेणा
मन में पक्की ठहर ले
ल्या मैं पैहरु तेरी अंगूठी
तू मेरी पैहर ले
या तो मैं भी जाण गया
या बात भारी सै
तन्नै लागती बात या भारी
होवण आरी सै
हे रै रै रै रै
साचम साच बता दे रै लिलो

किरणा सूरज सिर के ऊपर
सेहरे हो लिये
कमल चौधरी और जोहरी
माहरे डेरे हो लिये
ज़िन्दगी भर के सेवक
लिलो तेरे हो लिए
पीपल जामण रहे गवाह
म्हारे फेरे हो लिये
पाणी ने पंडत समझ रै
इश्क़ लोक जारी सै
कह धनपत सिंह हो लिए फेरे
ना लिलो कवांरी सै
हे रै रै रै रै
साचम साच बता दे रै लिलो